Leikskólinn Maríuborg auglýsir eftir deildarstjóra í fullt starf. Leikskólinn er staðsettur í Maríubaug 3 í Grafarholti. Náttúrufegurðin umkringir leikskólann og skapar einstakt tækifæri fyrir börnin til náms. Útisvæðið okkar er því fullt af töfrum sem gaman er að upplifa. Skólinn er bjartur og fallegur og skiptist í fjórar deildir, þar af íþróttasal, tvær kubbastofur og listasmiðju, auk starfsmannarýmis og eldhúss.

Einkunnarorð okkar og megingildi eru LEIKUR-SAMSKIPTI-NÁMSGLEÐI og er það grunnurinn að öllu okkar starfi. Við leggjum áherslu á læsi, frjálsan leik og félagsfærni. Lubbi finnur málbein og Vináttuverkefni Barnaheilla eru einnig ómissandi þáttur í lífi og námi barnanna í Maríuborg en söngur og tónlist skipar einnig stóran sess í starfi okkar. Þá er einnig starfrækt læsisteymi við leikskólann sem heldur utan um gerð læsis- og málstefnu Maríuborgar, sem verið er að vinna að.

Að okkar mati er mikilvægt að leikur barna og skapandi starf fái rými og að börn nái að blómstra út frá sínum styrkleikum í ró og næði. Í Maríuborg er því lögð áhersla á faglegt starf sem þróast í takt við nýjustu rannsóknir og reynslu í menntunarfræði ungra barna. Þá er unnið eftir Menntastefnu Reykjavíkur, Draumar geta ræst, sem og Aðalnámskrá leikskóla. Námskrá leikskólans er í vinnslu en í því felst skemmtilegt tækifæri til að móta framtíðar stefnu leikskólans í virku lærdómssamfélagi.

Helstu verkefni og ábyrgð

Vinna að uppeldi og menntun leikskólabarna samkvæmt starfslýsingu deildarstjóra og skólanámskrá
Fagleg forysta og stjórnun deildarinnar
Skipulagning og mat á starfi deildarinnar
Foreldrasamvinna

Menntunar- og hæfniskröfur

Leikskólakennaramenntun og leyfisbréf kennara eða önnur háskólamenntun skilyrði.
Jákvæðni og frumkvæði í starfi og faglegur metnaður.
Reynsla af uppeldis- og kennslustörfum með ungum börnum æskileg
Hæfni og sveigjanleiki í samskiptum.
Ábyrgð og áreiðanleiki.
Íslenskukunnátta á stigi c1 samkvæmt evrópska tungumálarammanum er skilyrði.
Hreint sakavottorð í samræmi við lög og reglur Reykjavíkurborgar

Fríðindi í starfi

36 stunda vinnuvika miðað við fullt starf
Sund- og menningarkort
Afsláttur af leikskólagjaldi fyrir barn í leikskóla í Reykjavík
Samgöngusamningur
Boðið er upp á heitan mat í hádeginu, morgunmat og síðdegishressingu.

Laun eru samkvæmt kjarasamningum Reykjavíkurborgar og hlutaðeigandi stéttarfélags. Starfið er laust í júní eða eftir samkomulagi.

Nánari upplýsingar veitir Erna Agnes Sigurgeirsdóttir, leikskólastjóri. erna.agnes.sigurgeirsdottir@reykjavik.is

Sími 411-3800 / 698-9309.

Deildarstjóri í Maríuborg